TOShKENT, 11 avg — Sputnik. Minskdagi ommaviy tartibsizliklar vaqtida bir erkak halok bo‘ldi. Bu haqda Sputnik Belarus mamlakat IIV rasmiy vakili Olga Chemodanova so‘zlariga tayangan holda xabar qildi.
“Maydondagi qurshovni to‘xtatish uchun yetib kelgan spesnazga qarshilik ko‘rsatish vaqtida namoyishchilardan biri huquqni muhofaza qiluvchi organ xodimlari tomon noma’lum portlovchi qurilmani uloqtirishga urindi”, - dedi Chemodanova.
Uning aniqlik kiritishicha, qurilma erkakning qo‘lida portlab ketgan va olgan jarohati tufayli hayotdan ko‘z yumgan
Hodisa joyida tergov-tezkor guruhi surishtiruv ishlarini olib bormoqda va hodisa tafsilotlari aniqlanmoqda.
Belarusda prezident saylovlaridan so‘ng norozilik namoyishlari 10-avgust kuni ham bo‘lib o‘tdi. Saylov natijalaridan rozi bo‘lmagan fuqarolar Minsk markazida to‘plandi. Huquq-tartibot va namoyishchilar o‘rtasida to‘qnashuv bo‘lib o‘tdi. Hozirda namoyishchilar tarqatib yuborilgan.
