TOShKENT, 26 fev — Sputnik. Buxoro viloyati hokimi O‘ktam Barnoyev Qozon shahrida Tatariston prezidenti Rustam Minnixanov bilan uchrashdi. Bu haqda Tatariston prezidenti matbuot xizmati xabar berdi.
Uchrashuvda Tatariston hamda Buxoro viloyatidagi korxonalar o‘rtasidagi hamkorlikni rivojlantirish, o‘zaro yetkazib berilayotgan mahsulotlar va xizmatlar hajmi hamda turlarini ko‘paytirish, gumanitar aloqalarni mustahkamlash masalalari muhokama etildi.
Minnixanov faollik bilan olib borilgan ishlar natijasida 2018-yilda Tatariston va O‘zbekiston o‘rtasidagi tovar ayirboshlash hajmi 50 foizdan ko‘proqqa o‘sib, 146 mln dollarni tashkil etganini qayd etdi. O‘tgan yil yakunlariga ko‘ra esa o‘zaro savdo hajmi 195 mln dollarga yetgan.
Tatariston prezidentining so‘zlariga ko‘ra, bu borada yetakchi tatar kompaniyalari tomonidan katta ishlar olib borilmoqda. 2019-yilda Samarqandda “KAMAZ” rusumli avtotransport vositalarini yig‘ish liniyasi ishga tushirildi. “Tatneft” hamda “GMS” guruhi kompaniyalari o‘zlarining loyihalarini amalga oshirmoqdalar.
Shuningdek, Rustam Minnixanov Tatariston hamda O‘zbekiston o‘rtasida muntazam aviaqatnov yo‘lga qo‘yilganligini ta’kidlab, Qozon va Buxoro shaharlarini to‘g‘ridan to‘g‘ri bog‘lovchi aviaqatnovni tashkil etish taklifini bildirdi. Bu ikki tomonlama ishbilarmon doiralarning o‘zaro hamkorligi va sayyohlar oqimining ortishiga xizmat qilishi e’tirof etildi.
Eslatib o‘tamiz, Rustam Minnixanov o‘tgan yilning noyabr oyida ikki kunlik tashrif bilan O‘zbekistonga tashrif buyurgan edi. Tashrif doirasida O‘zbekiston prezidenti bilan uchrashgan edi.
