TOShKENT, 9 yanv – Sputnik. Yangi o‘quv yilidan Toshkent shahrida Amiti universitetining (Hindiston) filiali ochiladi. Bu haqda tegishli qaror 7-yanvarda qabul qilindi, deb xabar qildi O‘zbekiston Axborot texnologiyalari va kommunikatsiyalarni rivojlantirish vazirligi matbuot xizmati.
Universitet axborot-kommunikatsiya texnologiyalari, jumladan, komputer va dasturiy injiniring, sun’iy intellekt va menejment sohalarida mutaxassislar tayyorlaydi.
Amiti universiteti – Hindistonda yetakchi xususiy oliy ta’lim muassasasi hisoblanadi. Ta’lim muassasasining bosh korpusi Noida shahrida joylashgan bo‘lib, uning 11 ta shaharda (Mumbay, Jaypur, Kolkata va boshqalar) kampuslari mavjud. Shuningdek, Nyu-York, London, Dubay, Singapur, Xitoy, JAR va jahonning boshqa shaharlarida filiallari faoliyat yuritadi.
Eslatib o‘tamiz, mazkur universitet filialini ochish bo‘yicha kelishuv Shavkat Mirziyoyevning Hindistonga davlat tashrifi doirasida imzolangan edi.
