TOShKENT, 16-may — Sputnik. Toshkent shahar hokimligida O‘zbekiston Bosh vaziri Abdulla Aripov boshchiligida yig‘ilish bo‘lib o‘tdi, deb xabar berdi hokimlik matbuot-xizmati.
Xabar qilinishicha, ushbu yig‘ilishda Aripov Qahramon Tursunovich Toshkent shahar hokimining iqtisodiyot va tadbirkorlik masalalari bo‘yicha birinchi o‘rinbosari lavozimiga tayinlangan.
"Bunga qadar Aripov Qahramon Tursunovich O‘zbekiston Respublikasi Maktabgacha ta’lim vaziri o‘rinbosari lavozimida ishlagan", — deb eslatib o‘tilgan xabarda.
Qahramon Aripov 1968-yilda Toshkent shahrida tug‘ilgan. 1995-yilda Toshkent Moliya institutini tamomlagan.
Aripovning mansab pillapoyasi
2002-2005 yillarda Markaziy bank Toshkent shahar Bosh boshqarmasi boshlig‘i, 2005-2007 yillarda "Asaka" davlat-aksiyadorlik tijorat banki boshqaruvi raisining birinchi o‘rinbosari, 2007-2016 yillarda "Asaka" davlat-aksiyadorlik tijorat banki boshqaruvi raisi, 2017-2018 yillarda O‘zbekiston Respublikasi Maktabgacha ta’lim vaziri o‘rinbosari lavozimida ishlagan.