TOShKENT, 24 yanv — Sputnik. Xitoyda yigirma uch yoshgacha bo‘lgan futbolchilar o‘rtasida davom etayotgan Osiyo chempionatining yarim finalida O‘zbekiston terma jamoasi Janubiy Koreya vakillarini mag‘lubiyatga uchratib, bosh sovrin uchun bo‘ladigan bahsga yo‘l oldi, deb xabar qildi "Xalq so‘zi" nashri.
23 Yanvar 2018, 17:55
Murosasiz kurashlarga boy bo‘lgan o‘yinda hamurtlarimiz 4:1 hisobida g‘alaba qozonishdi. Uchrashuvda gollarga terma jamoamiz a’zolaridan Zabihullo O‘rinboyev, Azizjon G‘aniyev, Jasur Yaxshiboyev va Akromjon Komilov mualliflik qildi. Raqiblarning yagona javob to‘pi Xvang Xun Su tomonidan darvozamizga kiritildi.
Yana bir yarim final bahsida Vyetnam terma jamoasi qatarlik tengdoshlaridan ustun keldi. Mazkur o‘yinning asosiy vaqti 1:1 hisobida yakunlandi. Qo‘shimcha daqiqalarda ham shu hisob saqlanib qoldi. Penaltilar seriyasida esa omad vyetnamliklarga kulib boqdi.
Shu tariqa 27-yanvar kuni bo‘lib o‘tadigan final bahsida O‘zbekiston va Vyetnam terma jamoalari o‘zaro bellashadigan bo‘ldi.
