TOShKENT, 14 dek — Sputnik. Joriy yil 11 dekabr kuni O‘zbekiston Respublikasi Ichki ishlar Vazirining birinchi o‘rinbosari general-mayor Davron Nazarmuxamedov rahbarligida jinoyatlarni barvaqt oldini olish, ularni fosh etish va huquqbuzarliklar profilaktikasi yuzasidan videoselektor yig‘ilishi o‘tkazildi, deb xabar qildi IIV matbuot-xizmati.
Jumladan, Samarqand, Toshkent viloyatlarida tashkil etilgan sektorlarga biriktirilgan rahbar va xodimlarning mahallalarda targ‘ibot-tashviqot ishlari, jinoyatlarni barvaqt aniqlashga doir chora-tadbirlari yetarli samara bermayotgani ta’kidlandi.
Yig‘ilishda respublika miqyosida, qotillik, qasddan badanga og‘ir shikast yetkazish, bosqinchilik, talonchilik, o‘g‘rilik, firibgarlik, bezorilik, transport vositalarini olib qochish kabi jinoyat turlari kamayishiga qaramasdan, ba’zi hududlarda ayrim turdagi jinoyatlarning ko‘rsatgichlari yuqorilicha qolayotganligi ko‘rsatib o‘tildi.
Yig‘ilishda salbiy ko‘rsatgichlar kuzatilgan hududlarning ichki ishlar boshqarmalari rahbarlarining hisobotlari eshitildi. Yil yakuni bo‘yicha jinoyatchilik ko‘rsatgichi tahlil qilinib, jinoyatni oldini olishda keng jamoatchilik bilan hamkorlik yo‘nalishida ijobiy natijaga erishmagan xodimlarga keskin choralar ko‘rilishi haqida ogohlantirildi.