"Buxoro" futbol klubi 55 million so‘mlik jarimaga tortildi

TOShKENT, 25 okt — Sputnik. Oliy Liga 25-tur doirasidagi "Buxoro" (Buxoro) hamda "Paxtakor" (Toshkent) klublari o‘rtasidagi uchrashuvda yuzaga kelgan nizoli vaziyatlar sababli "Buxoro" futbol klubi 55 mln so‘m miqdorida jarimaga tortildi, deya xabar qildi O‘zbekiston Futbol federatsiyasi matbuot xizmati.

"Oliy Liga 25-turi doirasidagi "Buxoro" — "Paxtakor" uchrashuvida yuz bergan mojaroli vaziyatlar yuzasidan O‘zPFL yig‘ilish o‘tkazdi.

Ushbu yig‘ilishda, "Buxoro"-"Paxtakor" uchrashuvida yuzaga kelgan nizoli vaziyatlar, ya’ni futbol uchrashuvi vaqtidagi tartibning to‘liq ta’minlanmaganligi, "Buxoro" futbol klubi rasmiy xodimlarining belgilangan tartib-intizom va qoidalarga to‘liq rioya etmaganligi, shuningdek, uchrashuv rasmiylarining xavfsizligi yetarli darajada ta’minlanmaganligi kabi holatlar o‘rganib chiqildi", — deyiladi xabarda.

Majlisda videoyozuvlar, uchrashuv nazoratchisi hamda O‘zPFL vakilining bildirgisiga asosan, O‘zbekiston yarim havaskor va yarim professional futbol klublari o‘rtasidagi musobaqa reglamenti, Tartib-intizom Kodeksi 5-modda, 4-bo‘lim, 5.57 bandiga asosan "Buxoro" klubiga nisbatan jarima qo‘llash haqida qaror qilindi.

"Buxoro" klubi yarim havaskor va yarim professional futbol klublari o‘rtasidagi musobaqa Reglamenti bandlariga asosan 55 mln so‘m jarimaga tortildi.

Shunga o‘xshash vaziyat yana takrorlanadigan bo‘lsa, klubga nisbatan qattiqroq choralar ko‘rilishi bilan bir qatorda, "Buxoro" futbol klubi o‘z maydonidagi uchrashuvlarni muxlislarsiz yoki neytral stadionlarda o‘tkazishi haqida qattiq ogohlantirildi.