TOShKENT, 25 sen — Sputnik. 2017 yilning 23-sentabr kuni Termez shahrida O‘zbekiston Respublikasi va Afg‘oniston Islom Respublikasi delegatsiyalari uchrashuvi bo‘lib o‘tdi, deb xabar qildi O‘zbekiston Hukumat portali.
Uchrashuvda temir-yo‘l transporti sohasida O‘zbekiston va Afg‘oniston hamkorligiga doir muhim ikki tomonlama hujjatlar loyihalari muhokama qilindi.
Eslatib o‘tamiz, BMT Bosh Assambleyasida nutq so‘zlagan O‘zbekiston prezident Shavkat Mirziyoyev qo‘shni Afg‘oniston muammosiga to‘xtalib o‘tgandi.
"Afg‘onistonda tinchlikka erishishning yagona yo‘li — markaziy hukumat va mamlakat ichidagi asosiy siyosiy kuchlar o‘rtasida oldindan hech qanday shart qo‘ymasdan, to‘g‘ridan-to‘g‘ri muloqot olib borishdir", — deb ta’kidlagandi Mirziyoyev.
Shuningdek, Mirziyoyev O‘zbekiston Afg‘onistonning iqtisodiy tiklanishiga, uning transport va energetika infratuzilmasini rivojlantirishga, milliy kadrlarini tayyorlashga katta hissa qo‘shayotgani va bundan keyin ham hissa qo‘shishi haqida qo‘shimcha qilgandi.
