TOShKENT, 24 avg — Sputnik. O‘zbekiston yoshlar ittifoqi Markaziy Kengashi raisi Qahramon Quronboyev Shanxayda tahsil olayotgan va mehnat faoliyatini yuritayotgan O‘zbekistonlik yoshlarni yig‘ib, ular bilan ochiq muloqot o‘tkazdi, deb xabar qilindi Yoshlar Ittifoqi Raisining Feysbukdagi sahifasida.
Quronboyev muloqot davomida ularga yaratib berilgan shart-sharoitlar bilan yaqindan tanishgan. Imkoniyat va muammolarini o‘rganib, rejalari bilan qiziqqan.
"O‘zbekistonlik yoshlar doimiy hukumat e’tiborida ekanligini alohida ta’kidladi", — deb qayd etilgan xabarda.
Endilikda Xitoyda tahsil olayotgan O‘zbekistonlik yoshlar ham yoshlar tashkiloti qanoti ostida. "Bu esa yoshlar tashkilotining tom ma’noda, nafaqat O‘zbekistonda, balki butun dunyodagi yoshlarining ham manfaatini himoya qila olishdagi manzilli odimlaridan biri ekanligini amalda namoyon qildi", — deyilgan xabarda.
O‘zbekiston yoshlar ittifoqi delegatsiyaning Xitoydagi safari davom etadi.