TOShKENT, 21-iyul — Sputnik. Toshkent shahar Ichki ishlar bosh boshqarmasi xodimlari Internet tarmog‘ida paydo bo‘layotgan huquqbuzarliklar aks etgan roliklarni nazoratga olib, ularda qayd etilayotgan faktlarni tezkorlik bilan o‘rganishmoqda, deb xabar qildi Toshkent IIBB rahbari o‘rinbosari, Tergov qo‘mitasi rahbari Doniyor Toshxo‘jayev.
"Huquqni muhofaza qilish organlari xodimlari nazariga tushayotgan videoroliklar albatta qayd etilmoqda, ular bo‘yicha surishtiruv ishlari o‘tkazilmoqda. Jinoyat sodir etilganligi aniqlansa zarur tergov tadbirlari boshlab yuborilmoqda", — deb aytgan Toshxo‘jayev.
Huquqni muhofaza qilishi organlari vakillari, shuningdek, elektron pochtaga anonim tarzda yuborilayotgan roliklar ham ko‘rib chiqilayotganini qo‘shimcha qilishgan. Shu bois, videoda jinoyatchi muhrlanganligi tufayli o‘z hayotidan xavfsirayotgan fuqarolar hech qanday qo‘rquvsiz roliklarni militsiyaga yo‘llashlari mumkinligi aytilgan.
