Sherali Jo‘rayev o‘z yubileyini "Versal" restoranida nishonladi

TOShKENT, 14 apr — Sputnik. Ustoz san’atkor Sherali Jo‘rayev 70-yillik yubileyini Toshkentdagi "Versal" restoranida nishonladi. Tadbirda ishtirok etgan mehmonlar bu haqda facebookda ma’lum qilishdi.

Eslatib o‘tamiz, 12-aprel kuni O‘zbekiston xalq artisti Sherali Jo‘rayev 70 yoshni qarshi olgan edilar.

Yubiley tadbirida ishtirok etgan O‘zbekiston xalq shoiri Xurshid Davron ijtimoiy tarmoqlarda 13-aprel kuni kech soat 21.00da quyidagi so‘zlarni yozib qoldirganlar:

"Hozirgina ustoz san’atkor Sherali Jo‘rayevning 70 yoshga to‘lishi bilan "Versal"da o‘tkazilgan marosimdan qaytdim.

Tantanada Turkiya, Ozarbayjon, Tojikiston, Koshg‘ardan kelgan mehmonlar ishtirok etishdi. Yubiley haqiqiy bayram bo‘ldi. Akademik Baxtiyor Nazarov, O‘zbekiston xalq shoiri Usmon Azim, Tojikiston xalq artisti Jo‘rabek Murodov shoir, kursdoshim Sa’dulla Hakim, adabiyotshunos olim Olimjon Davlat va uka.shoir Abduvali Qutbiddin bilan bir dasturxonda o‘tirdik.

Sherali akani chin dildan qutlab, yangi ijodiy yutuqlar, salomatlik tilab qolaman".