TOShKENT, 22 mar — Sputnik. Avtobuslar O‘zbekiston hukumati tasdiqlagan "Toshshahartransxizmat" korxonasi harakat sostavi parkini yangilash dasturi doirasida sotib olinadi, deb xabar bermoqda Sputnik O‘zbekiston muxbiri.
Yo‘lovchilarga xizmat ko‘rsatish uchun ikki turdagi — katta sig‘imli MAN (350 dona) va o‘rta sig‘imli Isuzu (515 dona) avtobuslari sotib olinadi. Har ikki brenddagi avtobuslar Samarqanddagi zavodlarda ishlab chiqariladi. Bu yilning o‘zida 190 dona, 2018-yilda 285, 2019-yilda 390 dona avtobus sotib olinadi.
Katta sig‘imli avtobuslar davlat budjeti mablag‘lari evaziga, o‘rta sig‘imli avtobuslar esa tijorat banklari kreditlari, Asaka-Trans-Leasing, O'zavtosanoat-leasing lizing kompaniyalari vositalari evaziga sotib olinadi.
MAN Avto-Uzbekistan korxonasi yana bir tashabbus bilan chiqqan — joriy yilning o‘zida "Toshshahartransxizmat"ning barcha korxonalari MAN avtobuslariga texnik xizmat ko‘rsatuvchi servis markazlari tashkil etiladi.