TOShKENT, 9 fev — Sputnik. O‘zbekistonlik hakam Ravshan Ermatov 2018-yili Rossiyada bo‘lib o‘tadigan jahon chempionatida ishlashi mumkin bo‘lgan nomzod hakamlar ro‘yxatiga kiritildi. Bu haqda O‘zbekiston futbol federatsiyasi matbuot xizmati xabar bermoqda.
Umumiy ro‘yxatdan jami 53 nafar hakam joy olgan bo‘lib, ulardan 7 nafari Osiyo qit’asidan.
Xabarda bildirilishicha, 3-7 aprel kunlari Italiyaning Florensiya shahridagi Koverchano tayyorlov markazida nomzod hakamlar uchun seminar bo‘lib o‘tadi.
Ravshan Ermatov JCh-2010 va JCh-2014 turnirlarida jami 9 ta uchrashuvni boshqargan bo‘lib, bu ko‘rsatkich bo‘yicha jahon rekordchisi sanaladi.
Futbol bo‘yicha 21-jahon chempionati 2018-yil 14-iyundan 15-iyulga qadar Rossiyaning 11 shahrida bo‘lib o‘tadi.