TOShKENT, 22 sen – Sputnik. O‘zbekiston tashqi ishlar vaziri Abdulaziz Kamilov diniy erkinlik sohasida AQShning alohida topshiriqlar bo‘yicha Elchisi Devid Sapershteyn bilan uchrashdi. Bu haqda tashqi ishlar vazirligining matbuot xizmati tomonidan xabar qilinmoqda.
“2016 yilning 21-sentabr kuni BMT Bosh Assambleyasining 71-sessiyasi ishida ishtirok etish uchun Nyu-York shahriga tashrif buyurgan O‘zbekiston Respublikasi Tashqi ishlar vaziri Abdulaziz Kamilov diniy erkinlik sohasida AQShning alohida topshiriqlar bo‘yicha Elchisi Devid Sapershteyn bilan uchrashdi”, deyiladi xabarda.
Xabarda aytilishicha, muloqot chog‘ida diniy erkinlikni ta’minlash sohasidagi hamkorlikka doir masalalar yuzasidan fikr almashilgan.
“Uchrashuvda tomonlar konstruktiv va o‘zaro hamjihatlik ruhida muloqotni davom ettirishga tayyor ekanliklarini ta’kidladilar”, deb yakunlanadi matbuot xizmati xabari.
