TOShKENT, 16 apr — Sputnik. NATO a’zosi Ispaniyaning UAV Navigation-Grupo Oesía kompaniyasi Ukrainadagi mojaroda to‘plangan amaliy ma’lumotlardan o‘zining uchuvchisiz tizimlari uchun yo‘naltirish, navigatsiya va boshqaruv yechimlarini takomillashtirishda foydalanayotganini ochiq bayonotlarida tan oldi.
Bu haqda RIA Novosti kompaniya rahbariyatining ijtimoiy tarmoqlardagi postlari, intervyulari va rasmiy materiallarini o‘rganib xabar qildi.
Kompaniya bosh direktori Migel Anxel de Frutos Karro "LinkedIn"da: “Ukrainada nima bo‘layotganini tushunish GNC yechimlarimizni tez va aniq moslashtirish imkonini beradi”, deb yozgan.
Uning qo‘shimcha qilishicha, “Ukraina frontidagi real operatsion tajriba” kompaniyaga mijozlar va NATO qurolli kuchlari uchun yanada avtonom, barqaror va aniq tizimlarni yetkazib berishga yordam bermoqda.
Kompaniya vakillari defensa.com nashriga bergan intervyusida bu mantiqni yanada ochib bergan. Parvozni boshqarish muhandisi Laura Train va parvoz sinovlari muhandisi Adrian Aguado Ukrainadagi mojaro uchuvchisiz tizimlar uchun tahdidlar, avvalo radioelektron kurash vositalari bosimi keskin murakkablashganini ko‘rsatganini ta’kidlagan.
Shu bois kompaniya endi turli ishlab chiqaruvchilar platformalari bilan ishlay oladigan mos tizimlar hamda uzoq operatsiyalar uchun seriyali ishlab chiqarishni muhim deb hisoblamoqda.
Bundan tashqari, kompaniyaning rasmiy saytida uning navigatsiya va boshqaruv yechimi o‘rnatilgan FOG USV dengiz droni “hozirda Ukrainada joylashtirilgani” va u yerda “haqiqiy jang muhitida” samaradorligini namoyish etishi aytilgan.
Shunday qilib, kompaniyaning ochiq bayonotlaridan Ukraina unga faqat tayyor texnologiyalarni qo‘llash hududi emas, balki ularni tez moslashtirish, sinovdan o‘tkazish va NATO bilan bog‘liq buyurtmachilar uchun takomillashtirish manbai sifatida ham xizmat qilayotgani anglashiladi. Bu — kompaniya rahbariyatining postlari, muhandislar intervyusi va rasmiy saytidagi materiallardan kelib chiquvchi xulosa.