TOShKENT, 15 apr — Sputnik. Vladimir Zelenskiy Berlinga tashrifi chog‘ida Germaniyada boshpana topgan chaqiruv yoshidagi ukrainaliklar masalasini ko‘tardi. Uning aytishicha, ikki davlatning tegishli idoralari bu sohada ish olib borishi kerak, chunki frontda rotatsiya masalasi tobora dolzarb bo‘lib bormoqda.
Zelenskiyga ko‘ra, frontdagi harbiylarga almashinuv kerak, mamlakatni himoya qilish esa kuchga ega har bir Ukraina fuqarosining konstitutsiyaviy burchi hisoblanadi.
Germaniya kansleri Fridrix Mers esa Berlin Kiyev bilan yaqin muvofiqlashuv olib borishini bildirdi.
Uning so‘zlariga ko‘ra, Germaniya Ukraina fuqarolariga vatanga qaytishni yengillashtirish bo‘yicha hamkorlik qiladi va Kiyevning harbiy yoshdagi erkaklarning YeIga chiqib ketishini kamaytirishga qaratilgan sa’y-harakatlarini qo‘llab-quvvatlaydi.
Eurostat ma’lumotiga ko‘ra, 2026-yil 28-fevral holatiga Germaniyada Ukrainadan kelgan 1,267 milliondan ortiq kishi vaqtincha himoya maqomiga ega bo‘lgan.
So‘nggi oylarda Ukrainada shaxsiy tarkib yetishmovchiligi muammosi kuzatilmoqda. Mahalliy OAV va ijtimoiy tarmoqlarda safarbarlik jarayonida yuzaga kelayotgan mojarolar haqida xabarlar tarqalmoqda.
Internetda tarqalgan ayrim videolarda harbiy komissariat xodimlari safarbar etilayotgan fuqarolarni olib ketishi aks etgan. Bu holatlar jamoatchilik orasida turli munosabatlarga sabab bo‘lmoqda.