TOShKENT, 14 apr — Sputnik. Rossiyaning yetakchi chakana tarmoqlaridan biri bo‘lgan “Magnit” O‘zbekistondan fermer sabzavotlarining ilk partiyasini to‘g‘ridan-to‘g‘ri xarid qildi. Gap Uzagrostar Holding davlat kompaniyasi orqali agroagregator modelida tashkil etilgan yetkazib berish haqida bormoqda.
Kompaniya ma’lumotiga ko‘ra, 17 tonna sabzidan iborat birinchi partiya Sterlitamakdagi tarqatish markaziga yetib kelgan. Sabzi Farg‘ona vodiysi fermerlaridan qabul qilinib, Uzagrostar omborlarida “Magnit” standartlari asosida saralangan va jo‘natilgan.
Loyiha “Magnit” va O‘zbekiston Qishloq xo‘jaligi vazirligi o‘rtasida 2025-yilda imzolangan kelishuv doirasida yo‘lga qo‘yilgan. Uning maqsadi — Rossiya bozorini past mavsumda yangi sabzavot va mevalar bilan ta’minlash.
2026 yilda O‘zbekistondan to‘g‘ridan-to‘g‘ri shartnomalar asosida kamida 1500 tonna meva-sabzavot yetkazib berish rejalashtirilgan.
“Magnit-Agrofermer” bosh direktori Pavel Rojkovning aytishicha, vositachilarsiz yetkazib berish mahsulotni fermerdan do‘kon peshtaxtasigacha taxminan 10 kunda olib chiqish va narxni minimal darajada ushlab turish imkonini beradi. Kompaniya yil davomida yetkazib berish geografiyasini Sibir, Ural, Moskva va boshia mintaqalargacha kengaytirishni rejalashtirmoqda.
Uzagrostar Holding bosh direktori Fazliddin Muhiddinovga ko‘ra, “Magnit” O‘zbekiston fermer mahsulotlarini to‘g‘ridan-to‘g‘ri qabul qilishni boshlagan birinchi Rossiya riteyl kompaniyasi bo‘ldi. Kompaniya kelgusida bunday eksport kanalini Rossiyadan tashqari Xitoy, BAA va boshqa bozorlarda ham rivojlantirmoqchi.