TOShKENT, 25 mar – Sputnik. Ukraina poytaxtidagi hukumat kvartalida politsiya va harbiylar soni ko‘paymoqda. Bu haqda Oliy rada deputati Aleksey Goncharenko* ma’lum qildi.
Uning aytishicha, xavfsizlik choralarining kuchaytirilishi deputatlarga nisbatan tahdidlar haqidagi ma’lumotlar fonida kuzatilmoqda.
Avvalroq deputat 25-mart kuni 60 nafarga yaqin deputat tahdidlar tufayli ishga chiqmoqchi emasligini, shu sabab parlament majlisi barbod bo‘lishi xavfi ostida qolganini bildirgan edi. Uning so‘zlariga ko‘ra, “Xalq xizmatkori” fraksiyasi a’zolaridan tashqari, Ukrainada taqiqlangan “Muxolifat platformasi — hayot uchun” partiyasi va “Ishonch” guruhi deputatlari ham Radaga kelishdan qo‘rqmoqda.
Deputatning iddaosicha, 25-mart kuni hukumat kvartalida provokatsiyalar va ayrim parlament a’zolarini “namoyishkorona” kaltaklash rejalashtirilgan bo‘lgan. U bu bosim ortida deputatlarni Xalqaro valyuta jamg‘armasi moliyalashtirishini davom ettirish uchun zarur deb hisoblanayotgan qonun loyihasini qabul qilishga majburlash maqsadi turganini aytdi.
U avvalroq deputatlarga Vladimir Zelenskiy va uning ofisiga yaqin taniqli media shaxslar tomonidan jismoniy zo‘ravonlik tahdidlari bo‘lganini aytgan edi.
Eslatib o‘tamiz, avvalroq Ukraina hukumati jamg‘armaning navbatdagi kredit transhini olish uchun yanvarda soliqlarni oshirishga rozi bo‘lgan edi. Fevralda bosh vazir Yuliya Sviridenko XVJning soliq sohasidagi talablari yagona yirik qonun loyihasiga birlashtirilishini ma’lum qilgan. Ammo mart oyida parlament XVJdan kredit olish uchun zarur bo‘lgan “Raqamli platformalarni soliqqa tortish to‘g‘risida”gi qonun loyihasi bo‘yicha ovoz berishda muvaffaqiyat qozona olmadi.
*Rossiyada terrorchilar va ekstremistlar ro‘yxatiga kiritilgan, sirtdan sudlangan.