TOShKENT, 25 mar – Sputnik. Armaniston parlamenti Yevroosiyo iqtisodiy ittifoqi (YeOII) va unga a’zo davlatlar hamda Mo‘g‘uliston o‘rtasidagi vaqtinchalik savdo kelishuvini hamda YeOII va Birlashgan Arab Amirliklari (BAA) o‘rtasidagi iqtisodiy sheriklik to‘g‘risidagi bitimni ratifikatsiya qildi.
Mo‘g‘uliston bilan vaqtinchalik savdo kelishuvi 2025-yil 27-iyunda Minskda imzolangan bo‘lib, 367 ta tovar pozitsiyasi bo‘yicha imtiyozli savdo rejimini joriy etadi.
Bitim diplomatik kanallar orqali barcha ichki tartib-taomillar bajarilgani haqidagi oxirgi yozma xabarnoma olinganidan 61 kun o‘tgach kuchga kiradi.
YeOII va BAA o‘rtasidagi iqtisodiy sheriklik bitimi ham 2025-yil 27-iyunda Minskda imzolangan. Armaniston Iqtisodiyot vazirligi ma’lumotlariga ko‘ra, hujjat kuchga kirgach, Armanistonning BAAga eksport qilayotgan 270 turdagi tovaridan 217 tasi imtiyozli kirish rejimiga ega bo‘ladi. O‘rtacha bojxona boji esa 6 foizdan 2,6 foizgacha pasayadi.
Imtiyozli rejim ho‘l mevalar, pomidor, sharbatlar, asal, murabbo, shakarli mineral suv, shuningdek, alyuminiy mahsulotlari, tibbiy asboblar va radioelektron uskunalarni ham qamrab oladi.
YeOII tomonidan qaralganda, BAA bilan bitim tovar nomenklaturasining 85–86 foizi bo‘yicha imtiyozli kirishni nazarda tutadi, Mo‘g‘uliston bilan bitim esa cheklangan qamrovdan boshlab keyinchalik to‘liqroq liberallashtirishga o‘tish sxemasi asosida qurilgan.
YeOII
Yevroosiyo iqtisodiy ittifoqi (YeOII) - 2015-yil 1-yanvardan faoliyat yuritib kelayotgan xalqaro iqtisodiy birlashma. Ittifoqqa hozir Rossiya, Armaniston, Belarus, Qozog‘iston va Qirg‘iziston a’zodir. O‘zbekiston 2020-yilda YeOIIda kuzatuvchi maqomini oldi. Moldova, Kuba, Eron ham kuzatuvchi maqomiga ega.