TOShKENT, 19 mar — Sputnik. Navro‘z bayrami va Ramazon hayiti arafasida “Toshkent” avtovokzalidan shaharlararo yo‘nalishlarda qo‘shimcha avtobus qatnovlari tashkil etilmoqda. Bu haqda Transport vazirligi matbuot xizmati xabar qildi.
Ma’lum qilinishicha, amaldagi reyslardan tashqari har kuni shaharlararo yo‘nalishlarda 70 tadan ortiq qo‘shimcha avtobus qatnovi yo‘lga qo‘yilgan.
Qo‘shimcha reyslar Zomin, Samarqand, Jarqo‘rg‘on, Buxoro, Qorako‘l, Mirbozor, Navoiy, Jo‘sh, Nurota, Zarmitan, Zarafshon, Xatirchi, Qiziltepa, Konimex, Uchquduq, Kadan, Payariq, Shahrisabz, Qarshi, G‘uzor, Sherobod, Termiz, Denov, Uzun, Urganch, Xiva, Gurlan, To‘rtko‘l va Nukus yo‘nalishlarida amalga oshirilmoqda.
Qatnov jadvali va chipta narxlari bilan avtovokzalning ijtimoiy tarmoqlardagi rasmiy sahifalari orqali tanishish mumkin.
Chiptalarni avtovokzal chiptaxonalarida hamda “UzBus” mobil ilovasi orqali onlayn tarzda xarid qilish mumkin.