TOShKENT, 15 mar — Sputnik. Sport gimnastikasi bo‘yicha Jahon kubogi bosqichida O‘zbekiston terma jamoasi vakillari Oksana Chusovitina tayanib sakrash dasturida to‘rtinchi, Abdulaziz Mirvaliyev esa erkin mashqlar bo‘yicha beshinchi o‘rinni egalladi. Bu haqda MOQ matbuot xizmati xabar berdi.
Oksana Chusovitina va Abdulaziz Mirvaliyev final dasturida medallar uchun bahs olib bordi. Yakunda Chusovitina 13.133, Mirvaliyev esa 13.233 ball to‘pladi.
Shu tariqa, har ikki sportchi Turkiyaning Antalya shahrida o‘tkazilayotgan ushbu Jahon kubogi bosqichidagi ishtirokini yakunladi.
Musobaqaning mazkur bosqichida O‘zbekiston sharafini Abdulaziz Mirvaliyev, Humoyun Ismoilov, Rasuljon Abdurahimov va Oksana Chusovitina himoya qildi.