TOShKENT, 15 mar — Sputnik. O‘zbekiston diplomatlari Turkiya IIV vakillari bilan uchrashuvda yo‘qolgan fuqarolarni tezkor qidirish masalalari bo‘yicha ma’lumot almashishni kuchaytirishga kelishib oldi. Bu haqda “Dunyo” axborot agentligi xabar berdi.
Shuningdek, tegishli idoralar o‘rtasida to‘g‘ridan-to‘g‘ri hamkorlik mexanizmlarini yo‘lga qo‘yish va qo‘shma ishchi guruh tuzishga ham kelishildi.
Uchrashuvda Turkiya hududida vaqtincha yoki doimiy yashayotgan O‘zbekiston fuqarolarining huquqlarini himoya qilish, bedarak yo‘qolgan vatandoshlarni qidirish, shuningdek, mahalliy huquqni muhofaza qiluvchi organlar tomonidan chet el fuqarolarining murojaatlarini qabul qilish tartibini takomillashtirish masalalari ko‘rib chiqildi.
Bundan tashqari, jazoni ijro etish muassasalarida saqlanayotgan O‘zbekiston fuqarolari bilan uchrashuvlarni tashkil etish masalasi ham ko‘rib chiqildi.