TOShKENT, 12 mar — Sputnik. O‘qotar qurol muomalasini nazorat qilishga ixtisoslashgan tuzilmalar faoliyati kompleks o‘rganilmoqda.
Bu borada Narkotiklar va o‘qotar qurollarni nazorat qilish agentligi rahbarligida idoralararo ishchi guruh tuzilib, qurol-yarog‘ muomalasi, uni hisobga olish va nazorat qilish tizimi tahlil qilinmoqda.
Dastlabki bosqichda IIV tizimidagi bir qator yo‘nalishlar o‘rganildi. Joriy yil boshidan buyon o‘qotar qurol bilan bog‘liq 487 ta holat aniqlangan. Shundan 227 tasi huquqni muhofaza qiluvchi organlar tomonidan, 260 tasi esa fuqarolar tomonidan ixtiyoriy topshirilgan.
Tadbirlar davomida 255 dona turli o‘qotar qurol, 2841 dona patron, 57 dona qurolning asosiy qismi va 485,7 gramm portlovchi modda rasmiylashtirildi.
Shuningdek, Huquqiy statistika bosh markazida qurollar bo‘yicha hisobot yuritish tartibi va axborot bazalari imkoniyatlari tahlil qilindi. Tahlillar qurol aylanmasi haqidagi ma’lumotlarni yagona raqamli tizimda yuritish va turli idoralar bazalarini integratsiya qilish nazorat samaradorligini oshirishini ko‘rsatdi.
Bosh ekspert-kriminalistika markazida ballistik ekspertiza, Davlat o‘q-gilzotekasi va avtomatlashtirilgan identifikatsiya tizimi imkoniyatlari o‘rganildi. Mutaxassislar ballistik ma’lumotlar bazasini doimiy to‘ldirib borish jinoyatlarni tezroq ochishda muhim ahamiyatga ega ekanini ta’kidladi.
Jamoat xavfsizligi departamentida qurol muomalasini litsenziyalash va ruxsatnoma berish amaliyoti, shuningdek fuqaroviy va xizmat quroli nazorati o‘rganildi. Poytaxtdagi qurol-yarog‘ va o‘q-dori savdosiga ixtisoslashgan do‘konlar faoliyati ham tahlil qilindi.
O‘rganishlar yakunlariga ko‘ra, qurol muomalasi ustidan nazoratni kuchaytirish, axborot tizimlarini o‘zaro integratsiya qilish va sohani raqamlashtirish bo‘yicha takliflar ishlab chiqildi.zamonaviy raqamli yechimlarni joriy etishga qaratilgan taklif va tavsiyalar ishlab chiqildi.