TOShKENT, 9 mar — Sputnik. Tojikistonda muqaddas Ramazon oyi avval aytilganidek 30 kun emas, 29 kun davom etishi mumkin. Bu haqda Respublika Din ishlari bo‘yicha qo‘mitasi Sputnik Tojikistonga ma’lum qildi.
Qo‘mita ma’lumotiga ko‘ra, shu bois Ramazon hayiti 20-martda emas, 19-martda nishonlanishi ehtimoldan xoli emas.
“Ehtimol, bu yil Tojikistonda muqaddas Ramazon oyi 29 kun davom etar”, — deyiladi idora xabarida.
Ayni paytda bu ma’lumotni Tojikiston Ulamolar kengashi raisi Saidmukarram Abdulqodirzoda ham tasdiqlagan.
“Qamariy taqvimning avvalgi ikki oyi — Rajab va Sha’bon — ketma-ket 30 kun davom etgani sababli, tajriba, ilm va taqvimga ko‘ra, uchinchi oy odatda 29 kun bo‘ladi”, — dedi u.
Abdulqodirzodaning so‘zlariga ko‘ra, ko‘plab mamlakatlarda Ramazon Tojikistonga nisbatan bir kun oldin boshlangan. U ayrim davlatlar bundan mustasno ekanini qo‘shimcha qildi.
Uning ta’kidlashicha, islom dunyosining aksariyat davlatlari bu yil Ramazon hayitini (Id al-Fitrni) bir kunda — 19-martda nishonlashi mumkin.
Tojikiston muftiysi aholini mish-mish tarqatmaslikka va vahimaga berilmaslikka chaqirdi. Uning aytishicha, barcha qarorlar aniq taqvim hisob-kitoblari hamda shariat meyorlari asosida qabul qilinadi.