TOShKENT, 25 fev — Sputnik. AQSh prezidenti Donald Tramp ma’muriyati Ukraina hukumatini Qora dengizdagi Rossiya neft infratuzilmasiga berilgan zarbalar AQShning Qozog‘istondagi sarmoyalariga ta’sir qilgani haqida ogohlantirdi. Bu haqda Ukrainaning AQShdagi elchisi Olga Stefanishina CNN telekanaliga ma’lum qildi.
"Ukrainaning Novorossiyskka hujumlari Qozog‘iston orqali amalga oshirilayotgan ayrim Amerika investitsiyalariga ta’sir qilgani aytildi. AQSh Davlat departamenti bizga Amerika manfaatlariga zarar yetkazishi mumkin bo‘lgan harakatlardan tiyilish kerakligini bildirdi", — dedi u.
Stefanishinaga ko‘ra, AQSh Qozog‘istonda yirik iqtisodiy manfaatlarga ega bo‘lib, ular Ukrainadagi sarmoyalardan ancha katta. Shu bilan birga, u Kiyev mustaqillik yillari davomida bunday darajadagi investitsiyalarni jalb qila olmaganini qayd etdi.
Ma’lumotlarga ko‘ra, Amerikaga tegishli "Chevron" kompaniyasi Kaspiy quvurlari konsorsiumi (KTK)ning yirik aksiyadorlaridan biri hisoblanadi. Ushbu quvur orqali Qozog‘iston neft eksportining qariyb 80 foizi amalga oshiriladi.
Hujumlar ortidan Qozog‘iston neft tashish va qazib olish hajmini vaqtincha qisqartirishga majbur bo‘ldi. Qozog‘iston Tashqi ishlar vazirligi Kiyevdan bunday holatlarning takrorlanmasligi yuzasidan choralar kutayotganini bildirgan. Keyinchalik Ostona va Kiyev KTK infratuzilmasi bo‘yicha kelishuvga erishgani ma’lum qilindi.