Meksikada narkokartel boshchisi yo‘q qilingach tartibsizliklar boshlandi

TOShKENT, 23 fev — Sputnik. Meksikaning eng yirik “Yangi avlod Xalisko” (CJNG) karteli rahbari Ruben Nemesio Osegera Servantes Xalisko shtatidagi Tapalpa shahrida o‘tkazilgan maxsus operatsiya chog‘ida qo‘lga olindi va keyinroq olgan jarohatlari oqibatida vafot etdi. Bu haqda Meksika milliy mudofaa vazirligi ma’lum qildi.

Vazirlik ma’lumotiga ko‘ra, operatsiya davomida harbiy xizmatchilarga qurolli hujum uyushtirilgan. Harbiylar javob o‘qi uzgan. To‘qnashuvda kartelning to‘rt nafar a’zosi voqea joyida halok bo‘lgan, uch nafari og‘ir yaralangan. Ulardan ayrimlari, jumladan Ruben “N” (El Mencho), Mexikoga havo transportida olib ketilayotganda vafot etgan. Yakuniy identifikatsiya vakolatli organlar tomonidan amalga oshirilishi bildirildi.

Kartel yetakchisining o‘limi haqidagi xabarlar ortidan mamlakatning kamida sakkizta shtatida ommaviy tartibsizliklar boshlandi.

Eng keskin vaziyat Xalisko shtatida kuzatildi. Gvadalaxara shahrida avtomobillar yoqib yuborildi, halqa yo‘li va bir nechta tumanlarda yo‘llar to‘sildi. Puerto-Valyarta kurort shahrida avtobuslar va avtomobillarga o‘t qo‘yildi, yonayotgan transport vositalari yo‘llarni to‘sib qo‘ydi. Ayrim reyslar bekor qilindi, armiya va Milliy gvardiya kuchaytirilgan tartibda jalb etildi.

Xalisko gubernatori Pablo Lemus Navarro “qizil trevoga rejimi” joriy etilganini ma’lum qilib, aholini uydan chiqmaslikka chaqirdi.

– Michoakan shtatida avtomobillarga o‘t qo‘yildi va yo‘llar to‘sildi.
– Guanaxuato shtatida do‘konlar va transport vositalariga hujumlar qayd etildi.
– Nayarit shtatida yo‘l blokadalari va ko‘priklar atrofida o‘t qo‘yish holatlari kuzatildi.
– Tamaulipas shtatida ham yo‘l to‘siqlari qayd etildi.

Karib dengizi sohilidagi Kintana-Roo shtatida, jumladan Kankun atrofida, yo‘llar yopildi. Playa-del-Karmen, Tulum va Kosumel hududlarida transport vositalari va tijorat obyektlariga o‘t qo‘yilgani haqida xabarlar tarqaldi. Turistik obyektlarga to‘g‘ridan-to‘g‘ri hujumlar tasdiqlanmagan, biroq ayrim sayyohlarga mehmonxonalarda qolish tavsiya etilgan.

Meksika prezidenti Klaudiya Sheynbaum fuqarolarni xotirjamlikni saqlashga chaqirdi va xavfsizlik kuchlariga minnatdorchilik bildirdi. Qator hududlarda favqulodda xavfsizlik protokollari faollashtirildi.