TOShKENT, 11 fev — Sputnik. Raqobat qo‘mitasiga 2025-yilda elektron tijorat sohasi bo‘yicha qariyb 3 100 ta murojaat kelib tushdi. Bu haqda qo‘mita matbuot xizmati xabar berdi.
Qayd etilishicha, qo‘rib chiqishlar natijasida 7,3 milliard so‘m fuqarolar foydasiga qayta hisob-kitob qilinishi ta’minlandi.
Tahlillarga ko‘ra, murojaatlarning asosiy qismi quyidagi platformalar hissasiga to‘g‘ri kelgan:
Tashkilot nomi | Murojaat- lar soni | Ulushi | Ijobiy hal etilgan |
Uzum Market | 851 | 27,8% | 72,7% |
Uzum Nasiya | 842 | 27,6% | 71,9% |
Yandeks | 329 | 10,8% | 63,5% |
Texnomart | 168 | 5,5% | 79,2% |
Ishonch | 166 | 5,4% | 81,3% |
Alif shop (alif moliya, alif nasiya) | 150 | 4,9% | 75,3% |
Uzum Tezkor | 115 | 3,8% | 82,6% |
Openshop.uz | 56 | 1,8% | 76,8% |
ZoodMall | 54 | 1,8% | 79,6% |
IDEA | 46 | 1,5% | 84,8% |
Ayrim murojaatlar sohada tizimli kamchiliklar mavjudligini ko‘rsatdi. Ularni tahlil qilish orqali qonunchilikni takomillashtirishga oid takliflar tayyorlandi.
O‘rganishlarda shartnoma shartlari, kafolatli servis, nuqsonli tovarni almashtirish, reklamada noto‘g‘ri ma’lumot, to‘lov va yetkazib berishdagi kamchiliklar, shuningdek, kreditga olingan nuqsonli tovarlarni almashtirish bilan bog‘liq qonunbuzilish holatlari aniqlandi.