TOShKENT, 3 fev — Sputnik. O‘zbekistonda Ijtimoiy reyestrga kiritilgan oilalarga bolalar nafaqasi va moddiy yordamni tayinlash va to‘lash tartibi belgilandi. Hukumat qarori bilan tegishli nizom tasdiqlandi.
Nizomga ko‘ra, bolalar nafaqasi yoki moddiy yordam tayinlash uchun ariza davlat xizmatlari markazi, ijtimoiy xodim yoki “YaMIH”, YaIDXP va “Ijtimoiy karta” ilovasi orqali beriladi. Har bir oila oyiga bir marta murojaat qilishi mumkin.
Oyning 16-sanasigacha berilgan arizalar shu oyda, 16-sanadan keyin berilganlari esa keyingi oyda ko‘rib chiqiladi.
Rad etish uchun asoslar bo‘lmasa, nafaqa yoki moddiy yordam ariza ko‘rib chiqilgan oydan keyingi oydan boshlab “Yagona reyestr”da avtomatik tarzda tayinlanadi va to‘lanadi.
To‘lovlar oilaning toifasiga qarab amal qiladi:
“davlat ta’minotidagi oila” va “kambag‘al oila” — ushbu toifada bo‘lib turgan davrida;
“kambag‘allik chegarasidagi oila” — ushbu toifaga kiritilgan oydan keyingi 6 oy davomida.
Agar oila “davlat ta’minotidagi” yoki “kambag‘al” toifasidan “kambag‘allik chegarasidagi oila” toifasiga o‘tkazilsa, qo‘shimcha arizasiz bolalar nafaqasi yoki moddiy yordam quyidagi miqdorda tayinlanadi:
— har bir a’zoga to‘g‘ri keladigan o‘rtacha oylik daromad minimal iste’mol xarajatlarining 1 baravaridan 1,25 baravarigacha bo‘lsa — qonunchilikda belgilangan miqdorning 75 foizi;
— 1,25 baravaridan 1,5 baravarigacha bo‘lsa — qonunchilikda belgilangan miqdorning 50 foizi.
— har bir a’zoga to‘g‘ri keladigan o‘rtacha oylik daromad minimal iste’mol xarajatlarining 1 baravaridan 1,25 baravarigacha bo‘lsa — qonunchilikda belgilangan miqdorning 75 foizi;
— 1,25 baravaridan 1,5 baravarigacha bo‘lsa — qonunchilikda belgilangan miqdorning 50 foizi.
Eslatib o‘tamiz, hozirgi kunda minimal iste’mol xarajatlari 669 ming so‘mni tashkil etadi.