TOShKENT, 28 yanv — Sputnik. Prezident farmoni bilan IIV, Milliy gvardiya va Favqulodda vaziyatlar vazirligi rahbariyatida o‘zgarishlar bo‘ldi. Bu haqda prezident matbuot xizmati xabar berdi.
Xususan, Azizbek Ikromov favqulodda vaziyatlar vaziri lavozimiga tayinlandi. Bundan ilgariroq Ikromov nomzodi Oliy Majlis Qonunchilik palatasi deputatlari tomonidan ma’qullangan edi.
Bahodir Toshmatov Milliy gvardiya qo‘mondoni lavozimiga tayinlandi va shu munosabat bilan Prezident huzuridagi Xavfsizlik kengashi kotibi o‘rinbosari lavozimidan ozod etildi.
Botir Qudratxo‘jayev ichki ishlar vazirining birinchi o‘rinbosari — Tezkor qidiruv departamenti boshlig‘i lavozimiga tayinlandi va shu munosabat bilan favqulodda vaziyatlar vaziri lavozimidan ozod etildi.
Ayubxon Rahmatullayev boshqa ishga o‘tishi munosabati bilan ichki ishlar vazirining birinchi o‘rinbosari — Tezkor qidiruv departamenti boshlig‘i lavozimidan ozod etildi.
Diyorbek Sattorov ichki ishlar vazirining o‘rinbosari – Ma’naviy-ma’rifiy ishlar va kadrlar bilan ta’minlash departamenti boshlig‘i lavozimiga tayinlandi va shu munosabat bilan Prezident administratsiyasi Jamoat xavfsizligi va qonun ustuvorligi bo‘yicha departamenti sho‘ba mudiri lavozimidan ozod etildi.
Davron Nazarmuhamedov ichki ishlar vazirining o‘rinbosari — Ma’naviy-ma’rifiy ishlar va kadrlar bilan ta’minlash departamenti boshlig‘i lavozimidan ozod etildi.
Rustam Mirzayev ichki ishlar vazirining komplayens va korrupsiyaga qarshi ichki nazorat bo‘yicha o‘rinbosari lavozimiga tayinlandi va shu munosabat bilan Prezident administratsiyasi Kommunikatsiyalar departamenti boshlig‘i o‘rinbosari lavozimidan ozod etildi.
Azizxon Umarxonov IIV huzuridagi Jazoni ijro etish departamenti boshlig‘i lavozimiga tayinlandi. Tayinlovga qadar Umarxonov Toshkent shahri Olmazor tumani hokimi lavozimida ishlab kelayotgan edi.
Rustam Jo‘rayev ichki ishlar vazirining birinchi o‘rinbosari — Jamoat xavfsizligi departamenti boshlig‘i lavozimiga tayinlandi va shu munosabat bilan Milliy gvardiya qo‘mondoni lavozimidan ozod etildi.