TOShKENT, 7 yanv — Sputnik. 2025 yil yakunlariga ko‘ra, Rossiya O‘zbekistonga 4,8 milliard dollar sarmoya kiritib, ikkinchi yirik investor bo‘ldi. Bu haqda Investitsiyalar, sanoat va savdo vazirligi matbuot xizmati xabar berdi.
Ma’lum qilinishicha, 2025-yilda O‘zbekistonda o‘zlashtirilgan xorijiy investitsiyalarning umumiy hajmi o‘tgan yilga nisbatan 24 foizga o‘sib, 43,1 milliard dollarga yetgan. Ushbu mablag‘larning asosiy qismini 38,2 milliard dollar miqdoridagi to‘g‘ridan-to‘g‘ri xorijiy investitsiyalar, shuningdek, 4,9 milliard dollar xalqaro moliya institutlari mablag‘lari tashkil etgan.
Eng yirik investor sifatida Xitoy yetakchilik qilmoqda — 15,5 milliard dollar, kuchli uchlikdan esa Turkiya ham o‘rin olgan — 2,6 milliard dollar.
Vazirlik ma’lumotiga ko‘ra, investitsion ishonchning o‘sishi O‘zbekiston bozoriga dunyoning yetakchi brendlari kirib kelishi hamda asosiy hamkorlar — Xitoy, Rossiya, Turkiya, Saudiya Arabistoni va BAA bilan faol hamkorlik bilan tasdiqlanmoqda.
Avvalroq, O‘zbekiston bosh vaziri o‘rinbosari Jamshid Xo‘jayev 3-dekabr kuni Toshkentda bo‘lib o‘tgan Rossiya–O‘zbekiston hukumatlararo komissiya yig‘ilishida 2025-yilda Rossiyadan O‘zbekiston iqtisodiyotiga 5 milliard dollarga yaqin investitsiya kiritilishi kutilayotganini bildirgan edi.
Investitsiyalar, sanoat va savdo vazirligi baholashicha, O‘zbekiston kelgusida ham har yili Rossiyadan kamida 5 milliard dollar sarmoya jalb qilish niyatida. Ayni paytda Rossiya O‘zbekistondagi eng yirik investorlardan biri bo‘lib qolmoqda: Rossiya kompaniyalarining mamlakat iqtisodiyotiga kiritgan jami investitsiyalari 15 milliard dollardan oshgan, 360 ga yaqin qo‘shma loyiha portfeli esa qariyb 60 milliard dollarni tashkil etmoqda.