TOShKENT, 28 okt – Sputnik. Afg‘onistonda to‘qimachilik sanoatini qayta tiklash bo‘yicha amaliy ishlar boshlandi, O‘zbekiston Savdo-sanoat palatasi (SSP) vakillari soha mutaxassislari bilan birga bir qator obyektlarda o‘rganish ishlarini olib bordi. Bu haqda SSP matbuot xizmati xabar berdi.
Bu ishlar O‘zbekiston SSP hamda Afg‘onistonning “Afg‘on tekstil korporatsiyasi” davlat korxonasi o‘rtasida ilgariroq imzolangan hamkorlik memorandumi asosida amalga oshirilmoqda.
Hujjat O‘zbekistonda faoliyati to‘xtagan ayrim korxonalarni Afg‘oniston hududida lokalizatsiya qilishni o‘z ichiga oladi.
Ushbu vazifalarni amalga oshirish maqsadida 18–23 oktabr kunlari Savdo-sanoat palatasi hamda sohaning malakali mutaxassislaridan iborat delegatsiyaning Afg‘onistonga xizmat safari uyushtirildi.
Safar davomida quyidagi fabrikalar o‘rganildi:
Parvon viloyati — “Gulbahor tekstil fabrikasi”
Kobul shahri — tikuv sexi
Qandahor viloyati — “Qandahor tekstil fabrikasi”
Mozori Sharif shahri — “Balx tekstil fabrikasi”
Bag‘lon viloyati — “Puli-Xumri tekstil fabrikasi”
Binolarning joriy holati, texnologik uskunalar, infratuzilma imkoniyatlari baholandi va avvalgi loyihalash uchun zarur texnik-iqtisodiy ma’lumotlar yig‘ildi.
Hozirda ekspertlar tomonidan ushbu ma’lumotlarni tahlil qilish jarayonlari olib borilmoqda. Ushbu jarayonlar Afg‘onistondagi tekstil korxonalarini qayta ishga tushirish bo‘yicha aniq takliflarni ishlab chiqishga xizmat qiladi.