TOShKENT, 22 okt – Sputnik. Rossiya tashqi savdo va eksport siyosatini qayta yo‘naltirib, Yevroosiyo iqtisodiy ittifoqi (YeOII), MDH, BRIKS va ShHT kabi mamlakatlarning istiqbolli bozorlariga chiqishni kengaytirmoqda.
Bu haqda Rossiya bosh vaziri Mixail Mishustin "Sdelano v Rossii" xalqaro eksport forumining yalpi majlisida so‘zlagan nutqida aytib o‘tdi.
"So‘nggi to‘rt yilda ushbu yo‘nalishlarda eksport hajmi barqaror oshib bormoqda. Agar 2021-yilda u umumiy hajmda atigi 44 foizni tashkil etgan bo‘lsa, 2024-yilda 85 foizdan oshdi. Joriy yilda ham bu tendensiya davom etmoqda", - dedi Mishustin.
Bosh vazir, shuningdek, Rossiyaning Osiyo, Afrika va Lotin Amerikasi davlatlari bilan savdo-iqtisodiy hamkorligi izchil kengayib borayotganini ta’kidladi.
Avvalroq global chaqiriqlarni yengib o‘tish uchun YeOII yagona transport-logistika makonini shakllantirayotgani haqida xabar berilgan edi.
Yevroosiyo iqtisodiy komissiyasi energetika va infratuzilma vaziri Arzibek Kojoshevning so‘zlariga ko‘ra, Ittifoq uchta ustuvor yo‘nalishga e’tibor qaratmoqda: tovarlarning to‘siqsiz harakatlanishini ta’minlash, transport tizimining samaradorligi va o‘zaro bog‘liqligini oshirish, transport xizmatlarining umumiy bozorini yaratish.