TOShKENT, 17 okt – Sputnik. Haj–2026 mavsumida Saudiya Arabistoni haj vizasini faqat “Nusuk” orqali tibbiy sog‘lomlik guvohnomasi olgan ziyoratchilarga berishi belgilandi. Bu haqda O‘zbekiston Din ishlari bo‘yicha qo‘mita matbuot xizmati xabar berdi.
Saudiya Arabistoni Sog‘liqni saqlash vazirligi haj safari bilan shug‘ullanuvchi vazirlik va idoralarga ziyoratchilarni tibbiy ko‘rikdan o‘tkazish hamda haj safariga borish layoqatiga mos kelmaydigan kasallik bor yoki yo‘qligini aniqlash majburiyatini yukladi.
Bayonotda, quyidagi kasalliklarga chalingan ziyoratchilar haj safariga yuborilmasligi ma’lum qilindi:
dializ talab qiladigan buyrak yetishmovchiligi;
Minimal jismoniy yuklamada ham namoyon bo‘luvchi yurak yetishmovchiligi;
davriy yoki doimiy ravishda kisloroddan foydalanishni talab qiluvchi o‘pkaning surunkali kasalliklari;
jigar yetishmovchiligi belgilari bilan kechuvchi jigar sirrozining og‘ir bosqichi;
og‘ir ruhiy va nevrologik buzilishlar;
qarilik demensiyasi kasalliklari;
homiladorlikning oxirgi uch oyi, shuningdek, yuqori xavfga ega bo‘lgan har qanday homiladorlik;
faol yuqumli kasalliklar (shu jumladan, silning ochiq shakli, gemorragik isitmalar va hokazo);
kimoterapiya yoki boshqa immunitetni susaytiruvchi muolajalar davomida kechayotgan faol onkologik kasalliklar.
️Saudiya Haj vazirligining mazkur talablari buzilgan yoki yolg‘on ma’lumot berilgan taqdirda choralar ko‘rilishi bildirilgan.