TOShKENT, 14 okt – Sputnik. O‘zbekiston prezidenti Shavkat Mirziyoyev Birlashgan kurash dunyosi (UWW) rahbari Nenad Lalovichni “Do‘stlik” ordeni bilan taqdirladi. Bu haqda prezident matbuot xizmati xabar berdi.
Qayd etilishicha, Lalovich ommaviy sport va yakkakurashni rivojlantirishga qo‘shgan hissasi uchun bu ordenga loyiq ko‘rilgan.
Uchrashuvda O‘zbekistonda yakkakurash sport turlarini rivojlantirish, ommaviy sportni qo‘llab-quvvatlash va infratuzilmani takomillashtirish masalalari muhokama qilindi.
Nenad Lalovich Yangi O‘zbekistonda sport sohasida amalga oshirilayotgan islohotlar, zamonaviy infratuzilmani yaratish va yoshlarni sport harakatiga jalb etish borasidagi ishlarga yuqori baho berdi.
Tomonlar mamlakatda xalqaro musobaqalar va chempionatlar o‘tkazish, Mintaqaviy kurash akademiyasini tashkil etish hamda sport tibbiyoti, diyetologiyasi va psixologiyasi sohalarida hamkorlikni yo‘lga qo‘yishga kelishdilar.
Prezident bolalar va yoshlar o‘rtasida yakkakurash sport turlarini ommalashtirish, iqtidorli sportchilarni tayyorlashning zamonaviy tizimini joriy etish va sport infratuzilmasini yanada yaxshilash muhimligini ta’kidladi.