TOShKENT, 8 okt – Sputnik. Toshkent shahar hokimligi delegatsiyasi Jenevada bo‘lib o‘tgan "Kelajakni shakllantirayotgan shaharlar" shiori ostida o‘tkazilgan BMT-2025 Shahar hokimlari forumining beshinchi yig‘ilishida ishtirok etdi. Bu haqda poytaxt hokimligi matbuot xizmati xabar berdi.
Forumda BMT Iqtisodiy va ijtimoiy kengashi (IIK), Jahon sog‘liqni saqlash tashkiloti (JSST), Xalqaro mehnat tashkiloti (XMT) hamda boshqa xalqaro tashkilotlar rahbarlari bilan bir qatorda, dunyoning 100 tadan ortiq poytaxt va yirik shaharlarining hokimlari qatnashdi.
Ishtirokchilar tajriba almashdilar, mintaqalararo hamkorlik istiqbollarini, shaharlar va mahalliy hamjamiyatlarning rolini, shuningdek, barqaror rivojlanishning asosiy masalalari bo‘yicha yechimlarni muhokama qildilar.
Forum doirasida Barqaror rivojlanish maqsadlari (BRM) ko‘rib chiqildi, jumladan:
yaxshi salomatlik va farovonlik (BRM–3);
gender tengligi (BRM–5);
munosib mehnat va iqtisodiy o‘sish (BRM–8).
Shuningdek, iqlim moliyalashtirish mexanizmlari hamda uy-joy qurilishi sohasidagi muammolar muhokama qilindi.
Toshkent shahar hokimligi vakillari “Yaxshi salomatlik va farovonlik” va “Gender tengligi” mavzularida ma’ruza qildilar.
Forum doirasida BMT IIK Ijrochi kotibi Tatana Molchan bilan ikki tomonlama uchrashuv ham bo‘lib o‘tdi. Suhbat chog‘ida transport, logistika va ekologiya sohalaridagi hamkorlik yo‘nalishlari muhokama qilindi. Hamkorlikni mustahkamlash bo‘yicha aniq qadamlarni o‘z ichiga olgan “yo‘l xaritasi”ni tayyorlash yuzasidan kelishuvga erishildi.