TOShKENT, 8 okt – Sputnik. Ozarbayjon prezidenti Ilhom Aliyev Turkiy davlatlar tashkiloti (TDT) yetakchilari kengashi sammitidagi nutqida 2026-yilda Ozarbayjonda TDTga a’zo davlatlarning qo‘shma harbiy mashg‘ulotlarini o‘tkazishni taklif qildi, deb xabar berdi RIA Novosti.
"Mamlakatlarimizning harbiy, mudofaa va xavfsizlik sohalaridagi keng ko‘lamli hamkorligini hisobga olib, 2026-yilda Ozarbayjonda Turkiy davlatlar tashkilotiga a’zo davlatlarning qo‘shma harbiy mashg‘ulotlarini o‘tkazishni taklif qilamiz", - dedi Ozarbayjon rahbari.
Turkiy davlatlar tashkiloti Davlat rahbarlari kengashining o‘n ikkinchi sammiti mintaqaviy tinchlik va xavfsizlik mavzusida bo‘lib o‘tdi.
Tashkilot tarkibiga Ozarbayjon, Qozog‘iston, Qirg‘iziston, Turkiya va O‘zbekiston kiradi. Vengriya hamda Turkmaniston kuzatuvchi maqomiga ega. TDT bosh qarorgohi Istanbul shahrida joylashgan.