TOShKENT, 3 okt — Sputnik. 7 oktabr kuni Moskvada Afg‘oniston bo‘yicha “Moskva formati” maslahatlashuvlarining navbatdagi — yettinchi yig‘ilishi bo‘lib o‘tadi. Bu haqda Rossiya TIV matbuot xizmati xabar berdi.
Yig‘ilish O‘zbekiston, Hindiston, Eron, Qozog‘iston, Xitoy, Qirg‘iziston, Pokiston, Rossiya, Tojikiston va Turkmaniston maxsus vakillari darajasida bo‘lib o‘tadi.
Mehmon sifatida Belarus delegatsiyasi taklif etilgan. Afg‘oniston tomonidan esa tashqi ishlar vaziri Amirxon Muttaqiy qatnashib, tadbir doirasida Rossiya tashqi ishlar vaziri Sergey Lavrov bilan alohida uchrashuv o‘tkazadi.
Majlisni Rossiya tashqi ishlar vaziri ochib beradi. U yopiq rejimda o‘tadi.
Yig‘ilishda Afg‘onistonda milliy yarashuv jarayoniga ko‘maklashish, mintaqa davlatlarining Kobul bilan siyosiy, iqtisodiy va xavfsizlik sohalaridagi hamkorligini kuchaytirish masalalari ko‘rib chiqiladi. Shuningdek, terrorizm va giyohvandlikka qarshi kurash mavzulariga ham alohida e’tibor qaratiladi.
Yakunda qo‘shma bayonot qabul qilinishi rejalashtirilgan.