TOShKENT, 3 okt — Sputnik. Joriy yilning sentabr oyida Ichki ishlar vazirligi (IIV), Davlat xavfsizlik xizmati (DXX) va Bojxona xizmati xodimlari hamkorligida transmilliy uyushgan narkojinoyatlichilikka qarshi xalqaro tezkor-qidiruv tadbiri o‘tkazilib, 111 kg bo‘lgan (81 kg gashish va 30 kg opiy) giyohvandlik vositalari qo‘lga kiritildi. Bu haqda IIV matbuot xizmati xabar berdi.
Xalqaro uyushgan narkoguruhning 6 nafar a’zolari Farg‘ona, Andijon va Toshkent viloyatlar hududida qo‘lga olindi.
Jumladan, 13-sentabr kuni Farg‘ona viloyatida yashovchi shaxs giyohvandlik vositalarini qabul qilib olayotgan vaqtida ushlandi.
Tezkor tadbir davom ettirilib, uyushgan guruhning Andijon viloyatida yashovchi 2 nafar a’zosi 10 kilogramm gashish giyohvandlik vositalarini ko‘mib qo‘yilgan joyidan olayotgan vaqtida ushlandi.
Olib borilgan tezkor surishtiruv ishlar davomida guruhning Andijon viloyatida yashovchi 2 nafar a’zosi oshxonada 6 ming dollar evaziga 1 kilogramm opiy giyohvandlik vositasini sotib olgan vaqtlarida qo‘lga olindi.
Toshkent viloyatining Angren shahrida davom ettirilgan tadbirda esa muqaddam 3 marotaba sudlangan shaxs 5 kilogramm opiy giyohvandlik vositasini qabul qilib olgan vaqtida ushlandi.
Ushbu jinoiy guruh bir necha yildan buyon faoliyat yuritib, Andijon, Farg‘ona va Toshkent viloyatlari hamda Toshkent shahrida giyohvandlik vositalarini tarqatish bilan shug‘ullanib kelgan.
Har bir holat yuzasidan Jinoyat kodeksining tegishli moddalari bilan jinoyat ishlari qo‘zg‘atilgan.
Tergov harakatlari olib borilmoqda.