TOShKENT, 27 sen — Sputnik. Toshkent viloyatida ovqatdan zaharlangan bolalar tez sog‘ayishmoqda, deb xabar qildi SSV Sanitar-epidemiologik qo‘mitasi raisi o‘rinbosari Nurmat Atabekov.
"Bugungi kunda Toshkent viloyati shifoxonalarida jami 694 nafar bolalar davolanmoqda. Ulardan 421 nafariga, ahvoli yaxshilangani sababli 27-sentabr kuni uyiga javob berish rejalashtirilgan. Dinamikada ijobiy natijalar kuzatilmoqda va bolalar tez sog‘ayishmoqda", - deyiladi xabarda.
Shu bilan birga, mutaxassislar davolanayotgan bolalardan 13 nafarining havolini o‘rtacha og‘ir baholamoqda.
Vazirlikda tashkil etilgan shtab xulosasiga ko‘ra, bemorlarga “o‘tkir gastroenterit” tashxisi qo‘yilgan. Bu kasallik og‘ir yoki hayot uchun xavfli toifaga kirmaydi va asoratsiz o‘tib ketadi.
Hozirgi kunda bolalar Toshkent viloyatining 7ta shifoxonalarida davolanmoqda. Ularga malakali xizmat ko‘rsatish maqsadida Toshkent shahridagi tibbiyot muassasalaridan 100 nafarga yaqin shifokorlar jalb etilgan. Dori vositalarning yetarli zaxirasi yaratilgan.
Sanepidemqo‘mita tomonidan olingan natijalar laboratoriyalarda tekshirilmoqda. Ularning natijasi haqida qo‘shimcha xabar beriladi. Aybdorlarga nisbatan huquqiy baho ham beriladi.
Atabekovning aytishiga ko‘ra, 24-sentabrdan buyon jami 1922 nafar bola tibbiy ko‘rikdan o‘tkazilgan.