TOShKENT, 26 sen – Sputnik. Toshkent shahrida Yoqutistonning (Saxa Respublikasi, Rossiya) kichik va o‘rta biznes vakillari ishtirokida xalqaro biznes-missiya bo‘lib o‘tdi. Bu haqda Rossiyaning O‘zbekistondagi Savdo vakolatxonasi xabar berdi.
Tashrif Rossiya Eksport markazi ko‘magida Yoqutiston Eksportni qo‘llab-quvvatlash markazi tomonidan tashkil etildi.
Delegatsiya O‘zbekiston bozoriga yo‘naltirilgan uchta innovatsion yo‘nalish bo‘yicha ishlangan yechimlarni taqdim etgan: veterinariya, kino sohasidagi texnologiyalar va raqamli ko‘chmas mulk savdosi. Tashrif doirasida o‘zaro manfaatli hamkorlik bo‘yicha B2B-uchrashuvlar, davlat tashkilotlari bilan muzokaralar va istiqbolli loyihalarni muhokama qilish ishlari olib borilgani aytilmoqda.
Taqdim etilgan loyihalar:
“Xotu-Bakt” ilmiy-ishlab chiqarish markazi o‘zining veterinariya vaksinalari va probiotik qo‘shimchalar liniyasini namoyish etdi. Klinik sinovlar natijasiga ko‘ra, mahsulotning samaradorligi 97,6% gacha yetgani aytildi. “Made in Russia” sertifikati esa mahsulotning xalqaro bozordagi raqobatbardoshligini oshiradi.
“Extra Cinima” kompaniyasi mobil kinoko‘rsatish tizimini taqdim etdi. Ushbu yechim hozirda Yoqutistonda 74 ta zalda ishlamoqda va 113 mingga yaqin tomoshabinni qamrab olgan.
“FlatGO” – sun’iy intellektga asoslangan raqamli rieltor tizimi, yakutiyalik tadbirkor Oleg Kondratyev tomonidan ishlab chiqilgan. Ilova 3D modellar asosida yangi qurilgan uylardan kvartira tanlash imkonini beradi.
Tashrif davomida delegatsiya O‘zbekistonning bir qator vazirlik va tashkilotlari, jumladan, UZBIOPHARM biofabrikasi, veterinariya sohasidagi distribyutorlar, madaniyat va ta’lim idoralari vakillari bilan uchrashuvlar o‘tkazgan. Muzokaralarda o‘zaro hamkorlik, mahsulotlarni O‘zbekiston bozoriga olib chiqish va texnologiyalarni lokalizatsiyalash imkoniyatlari muhokama qilini aytilmoqda.