TOShKENT, 18 sen – Sputnik. Qozog‘iston Respublikasi Turkiston viloyatining chegara hududlarida noqonuniy migratsiya kanalini tashkil etgan jinoiy guruh faoliyatiga chek qo‘yildi. Bu haqda Qozog‘iston IIV matbuot xizmati xabar berdi.
Xabarlarga ko‘ra, to‘rt nafar asosiy tashkilotchi va ularning sheriklari qo‘lga olinib, vaqtincha saqlash izolyatoriga joylashtirilgan.
Aniqlanishicha, qo‘lga olinganlar davlat chegarasini noqonuniy kesib o‘tishda qo‘shni davlat fuqarolariga yordam berganlikda gumonlanmoqda. Ular o‘z xizmatlari uchun har bir xorijlikdan 500 ming tengegacha, ya’ni 11 million so‘m atrofida pul olishgan.
Tintuv davomida gumonlanuvchilardan chet el pasportlari, soxta hujjatlar, elektron tashuvchilar va aloqa vositalari olib qo‘yilgan.
Tashkilotchilarga nisbatan Qozog‘iston Respublikasi Jinoyat kodeksining "noqonuniy migratsiyani tashkil etish" va "davlat chegarasini qasddan noqonuniy kesib o‘tish" moddalari bo‘yicha tergovga qadar tekshiruv boshlangan.