TOShKENT, 17 sen — Sputnik. Umumiy tarix xalqaro hamkorlik uchun poydevor bo‘lishi kerakligi haqida Rossiya prezidenti Vladimir Putin "Oltoy – turkiy xalqlar vatani. Turkiy sivilizatsiya tarixi boshlanishi" xalqaro anjuman ishtirokchilariga yo‘llagan tabrik maktubida ta’kidladi. Bu haqda RIA Novosti xabar berdi.
Tabrikni Rossiya Federatsiyasi rahbari yordamchisi Vladimir Medinskiy o‘qib eshittirdi.
Unda anjuman turkshinus va oltoyshunoslikning keng ko‘lamli ilmiy muammolarini, shuningdek, Yevrosiyoning boshqa xalqlari kelib chiqishi bilan bog‘liq masalalarni muhokama qilishga bag‘ishlangani hamda qit’a ko‘plab qadimiy sivilizatsiyalar beshigi ekanligi ta’kidlanadi.
"Ishonchim komilki, tarixning umumiy sahifalari, ajdodlarimizning harbiy va mehnat yutuqlari mintaqalararo va xalqaro gumanitar hamkorlikni muvaffaqiyatli rivojlantirish, insonlar o‘rtasidagi do‘stlik va o‘zaro hamjihatlikni mustahkamlash uchun mustahkam poydevor bo‘lishi kerak”, – deyiladi Rossiya prezidenti tabrigida.
Qayd etilishicha, Oltoyning "Manjerok" dam olish maskanida o‘tayotgan tadbirda O‘zbekiston, Rossiya, Belarus, Vengriya, Qozog‘iston, Qirg‘iziston, Turkmaniston, Ozarbayjondan yetakchi olimlar va mutaxassislar Yevrosiyodagi tarixiy-madaniy masalalarni muhokama qilish uchun to‘planishgan. Asosiy mavzulardan biri – umumiy madaniy-tarixiy merosni o‘rganish asrab-avaylash bo‘yicha hamkorlikdagi ishlar.
Bundan tashqari, xalqaro mualliflar katta guruhining fundamental asari – "Turkiy sivilizatsiya solnomasi"ning ikkinchi jildi taqdimoti o‘tkazilishi rejalashtirilgan.