TOShKENT, 11 sen – Sputnik. O‘zbekistonda steyblkoinlarni sinovdan o‘tkazish hamda qimmatli qog‘ozlarni tokenizatsiya qilish amaliyoti boshlanadi. Bu haqda Istiqbolli loyihalar milliy agentligi (ILMA) direktorining birinchi o‘rinbosari Vacheslav Pak o‘z intervyusida ma’lum qildi.
Ma’lumotlarga ko‘ra, O‘zbekiston prezidentining moliyaviy texnologiyalar sohasini rivojlantirish bo‘yicha tinglagan taqdimotida sohadagi eng so‘nggi innovatsiyalar va ularni O‘zbekiston moliyaviy bozoriga integratsiya qilish xususida so‘z borgan. Natijada Markaziy bank negizida Fintex ofisi hamda investitsion xab faoliyatini tashkil etish belgilangan.
“Moliya texnologiyalari kun sain ulkan sur’atlarda rivojlanib bormoqda. Shu bois O‘zbekiston uchun zamon bilan hamnafas bo‘lish juda katta ahamiyat kasb etgan. Pirovarddagi maqsadlarni ko‘zlab, davlatimiz rahbari tomonidan Istiqbolli loyihalar milliy agentligi hamda Markaziy bank hamkorligida steyblkoinlarni sinab ko‘rish va qimmatli qog‘ozlarni tokenizatsiya qilish amaliyotini joriy etish vazifasi topshirildi”, – deydi Vacheslav Pak.
Qo‘shimcha qilinishicha, O‘zbekistonda 2018-yilda Fintex korxonalar soni atigi 24 tani tashkil etgan. Bugungi kunda esa ularning soni 103 taga yetib, ular joriy yilda 260 million dollar investitsiya jalb etishgan.
Endilikda har yili Fintex festivallari hamda forumlarini o‘tkazish va ular orqali eng ilg‘or g‘oyalarni O‘zbekistonda sinab ko‘rish rejalashtirilgan.