TOShKENT, 10 sen – Sputnik. Toshkent shahrida O‘zbekiston hududlari va Sankt-Peterburg delegatsiyalari o‘rtasida muzokaralar bo‘lib o‘tdi.
Delegatsiyalarga O‘zbekiston bosh vazirining o‘rinbosari Jamshid Xodjayev hamda Sankt-Peterburg gubernatori Aleksandr Beglov rahbarlik qildi.
Tomonlar strategik sheriklikni mustahkamlashga va mintaqalararo aloqalarni kengaytirishga tayyor ekanliklarini bildirdilar.
Uchrashuv davomida muzokaralar yakunlari bo‘yicha bayonnoma va amaliy tadbirlar rejasi imzolandi. Mazkur hujjatlar savdo, sanoat kooperatsiyasi, transport, uy-joy kommunal xo‘jaligi, ta’lim, fan, madaniyat, turizm va sport sohalarida hamkorlikni nazarda tutadi.
Alohida e’tibor qurilish, sog‘liqni saqlash, farmatsevtika, mashinasozlik, metallurgiya, agro-sanoat majmuasi, xomashyo qayta ishlash, qurilish materiallari ishlab chiqarish hamda turizm infratuzilmasini rivojlantirishga qaratilgan investitsiya loyihalariga qaratildi.
ta’kidlanishicha, erishilgan kelishuvlarning amalga oshirilishi iqtisodiy aloqalarni mustahkamlash, yangi ish o‘rinlarini yaratish va eksport salohiyatini kengaytirishga xizmat qilib, O‘zbekiston hududlari va Sankt-Peterburgning barqaror ijtimoiy-iqtisodiy rivojlanishiga hissa qo‘shadi.
Shuningdek, tomonlar 2025-2026 yillarga mo‘ljallangan hamkorlikni rivojlantirish bo‘yicha amaliy chora-tadbirlar rejasi to‘g‘risidagi protokolni imzoladi.
"Biz imzolagan amaliy tadbirlar rejasi muloqotimizga yangi mintaqaviy ishtirokchilarni jalb qilishga yordam beradi. Yangi aloqalar o‘rnatiladi, qo‘shma ishbilarmonlik va madaniy tadbirlar o‘tkaziladi. Samarali muloqotingiz va O‘zbekiston hukumati tomonidan Sankt-Peterburg bilan hamkorlikni rivojlantirishga qaratilayotgan e’tibor uchun sizga minnatdorchilik bildiraman", - dedi Aleksandr Beglov.
Shu bilan birga, u "Peterburg va O‘zbekiston oldida savdo aylanmasini 2030-yilga borib bir milliard dollarga yetkazish vazifasi turganini" qo‘shimcha qildi.