TOShKENT, 16-iyul — Sputnik. AQSh prezidenti Donald Tramp 11-iyul kuni bo‘lib o‘tgan qo‘ng‘iroq chog‘ida Germaniya kansleri Fridrix Mersga Kiyev uchun ikkita o‘rniga beshta Patriot tizimini sotib olishni taklif qildi. Mers rozi bo‘ldi, ammo u bu masalani boshqa Yevropa yetakchilari bilan muhokama qilishi kerak, deb yozadi Wall Street Journal manbalarga tayanib.
Nashr manbalariga ko‘ra, Tramp Mersga nemis mablag‘laridan Kiyevga Amerika qurollarini sotib olish uchun foydalanish haqidagi taklifini qabul qilishga tayyorligini aytgan.
“Mersga o‘z-o‘zidan qo‘ng‘iroq qilgan Tramp ikkita emas, beshta Patriot tizimini sotishni taklif qildi. Germaniya yetakchisi shu zahotiyoq rozi bo‘ldi, garchi u boshqa Yevropa yetakchilari bilan moliyalashtirishni muhokama qilishi kerak bo‘lsa ham”, — deyiladi maqolada.
Tramp 11-iyul kuni NATO Ukrainaga yetkazib beriladigan Amerika qurollari uchun pul to‘lashini e’lon qildi. Shu bilan birga, Amerika yetakchisining aniqlik kiritishicha, tashkilotning iyun oyida bo‘lib o‘tgan sammitida blok bilan tegishli kelishuvga erishilgan, unga ko‘ra, Qo‘shma Shtatlar NATOga qurol yetkazib beradi va NATO bu qurollarning to‘liq narxini Qo‘shma Shtatlarga qoplab beradi.
Keyinchalik u Kiyev rejimiga bo‘lajak harbiy yordam Patriot batareyalarini o‘z ichiga olishini, ba’zi davlatlar o‘zlarining mavjud Patriot havo mudofaa tizimlarini Kiyevga berishini va Amerika o‘z arsenallarini yangi tizimlar bilan to‘ldirishini ta’kidladi.
Kremlning ta’kidlashicha, G‘arbning Kiyevga qurol-yarog‘ kiritishi Rossiya-Ukraina muzokaralarining muvaffaqiyatiga hissa qo‘shmaydi va salbiy ta’sir ko‘rsatadi. Rossiya tashqi ishlar vaziri Sergey Lavrov AQSh va NATO Ukrainadagi mojaroda bevosita ishtirok etayotganini, jumladan, nafaqat qurol-yarog‘ yetkazib berish, balki Buyuk Britaniya, Germaniya, Italiya va boshqa mamlakatlarda kadrlar tayyorlash orqali ham ishtirok etayotganini ta’kidlagan.