TOShKENT, 28-iyun — Sputnik. Isroil 2010-yilda Eronga hujum qilishga tayyorgarlik ko‘ra boshlagan va uning yadroviy dasturi rivojlanishini obyektlardagi agentlari orqali kuzatgan. Bu haqda Britaniyaning “Times” gazetasi razvedka hujjatlariga tayanib xabar berdi.
“Razvedka manbasining “Times” nashriga aytishicha, Isroil ko‘p yillar davomida razvedka agentlari yordamida bir qator obyektlarni kuzatgan, har bir joyda odamlar “oldindan” hozir bo‘lgan. Isroil 2010-yildayoq Eronga hujumga tayyorgarlikni uning qurol-yarog‘ dasturi tezlashayotgani haqidagi razvedka ma’lumotlariga asoslanib boshlagan”, — deb yozadi gazeta.
Gazetaning yozishicha, Isroil operatsiyasi Tehron va Isfahondagi uchta obyektda uranni boyitish sentrifugalarini ishlab chiqarish joylari haqidagi razvedka ma’lumotlaridan foydalangan holda amalga oshirilgan. Bundan tashqari, Isroil razvedkasi Natanzdagi uran bilan ishlash uchun yer osti va yer usti inshootlarini aniqlash uchun ayg‘oqchilardan foydalangan.
Shuningdek, Isroil Natanzdagi elektr ta’minoti infratuzilmasi, tadqiqot markazi binosi, transformator stansiyasi, ventilyatsiya shaxtalari va sovutish kanallariga zarba berdi, deb yozadi gazeta.
Gazeta keltirgan hujjatlarga ko‘ra, Eron sakkiz mingta raketa zaxirasini to‘plash maqsadida oyiga mingta uzoq masofaga uchuvchi “yer-yer” raketalarini ishlab chiqarishni rejalashtirgan. Mutaxassislarning fikricha, Isroil operatsiyasi vaqtida Tehronda 2-2,5 mingga yaqin ballistik raketalar bo‘lgan.
Isroil 13-iyunga o‘tar kechasi Eronni maxfiy harbiy yadro dasturini amalga oshirishda ayblab, unga qarshi operatsiya boshladi. Nishonlar atom obyektlari, generallar, taniqli yadro fiziklari va havo bazalari bo‘ldi.
Eron bu ayblovlarni rad etib, o‘z hujumlari bilan javob qaytardi. Tomonlar 12 kun davomida bir-birlariga zarba berishdi, 22-iyunga o‘tar kechasi AQSh Eron yadroviy obyektlariga bir martalik hujum uyushtirdi. Shundan so‘ng Tehron 23-iyun kuni kechqurun Qatardagi AQShning Al-Udeyd bazasiga raketa zarbalari berdi va Eron tomoni vaziyatni yanada kuchaytirish niyatida emasligini e’lon qildi.
Shundan so‘ng AQSh prezidenti Donald Tramp Yaqin Sharqda tinchlik va hamjihatlikka yo‘l ochish mumkinligiga umid bildirdi. Shuningdek, u Isroil va Eron o‘t ochishni to‘xtatishga kelishib olganini aytdi.