TOShKENT, 28-may — Sputnik. Rossiya prezidenti Vladimir Putin Yevroosiyo iqtisodiy ittifoqi (YeOII) kuni munosabati bilan Belarus, Qozog‘iston, Qirg‘iziston prezidentlari va Armaniston bosh vazirini tabrikladi. Tabrik matni Kreml saytida e’lon qilindi.
Yevroosiyo iqtisodiy ittifoqiga a’zo davlatlar rahbarlarining qarori bilan 29-may har yili YeOII kuni sifatida nishonlanadi.
Rossiya Federatsiyasi rahbari Ittifoq doirasidagi integratsiya jarayonlari juda jadal va samarali rivojlanayotganini qayd etdi. Aytilishicha, tovarlar, xizmatlar, kapital va ishchi kuchining erkin harakatini ta’minlaydigan umumiy bozor vujudga keltirildi.
Eng muhim sohalarda milliy huquqiy tartibga solish tizimlari uyg‘unlashtirilmoqda, qo‘shma iqtisodiy va infratuzilmaviy loyihalar muvaffaqiyatli amalga oshirilmoqda.
"Ishonchim komilki, biz bundan buyon ham xalqlarimiz farovonligi, Yevroosiyo makonida farovonlik va barqarorlikni ta’minlash yo‘lida konstruktiv ko‘p tomonlama hamkorlikni har tomonlama rivojlantiramiz", — dedi Putin.
Rossiya yetakchisi so‘zining yakunida yetakchilarga sihat-salomatlik va muvaffaqiyatlar, fuqarolarga baxt-saodat va farovonlik tiladi.
Eslatib o‘tamiz, Yevroosiyo iqtisodiy ittifoqiga a’zo davlatlar rahbarlarining qarori bilan har yili 29-may - YeOII kuni sifatida nishonlanadi.
2024 yilda Ittifoqning yalpi ichki mahsuloti 4,4 foizga o‘sdi, bu o‘tgan yilgi darajadan - 3,8 foizga va o‘rtacha jahon ko‘rsatkichlaridan - 3,3 foizga yuqori. shuningdek, YeOII bo‘yicha tashqi qarz yig‘indisi 2025-yil 1-yanvar holatiga ko‘ra yil davomida 26 milliard dollarga yoki 4,9 foizga kamaydi.