TOShKENT, 19-may — Sputnik. Yevroosiyo iqtisodiy komissiyasi (YeIK) sanoat va agrosanoat kompleksi vaziri Goar Barsegan sanoat sohasida hamkorlikni rivojlantirish uchun Yevroosiyo iqtisodiy ittifoqi (YeOII) va BRIKS o‘rtasida tizimli muloqot o‘rnatishni taklif qildi, deya xabar berdi komissiya matbuot xizmati.
Goar Barsegan bu tashabbusni BRIKS ayollar tadbirkorligi forumining “BRIKS va xalqaro institutlar: sa’y-harakatlarni barqaror kelajak kafolati sifatida birlashtirish” panel sessiyasida ma’lum qildi.
Ishtirokchilar BRIKS kun tartibini YeOII, YuNIDO (BMTning sanoatni rivojlantirish tashkiloti), ShHT (Shanxay hamkorlik tashkiloti), ASEAN (Janubi-sharqiy Osiyo davlatlari uyushmasi), YuNIDO va boshqa xalqaro tashkilotlar bilan integratsiyalash masalalariga e’tibor qaratishdi.
Barsegan jahon iqtisodiyotining yangi konfiguratsiyasining harakatlantiruvchi kuchlaridan biri sifatida BRIKS mamlakatlari bilan tizimli muloqotni rivojlantirish Komissiyaning asosiy ustuvor yo‘nalishlaridan biri ekanligini ta’kidladi.
“Shuni inobatga olgan holda, sanoat sohasida hamkorlikni rivojlantirish maqsadida Ittifoq va BRIKS o‘rtasida tizimli muloqotni shakllantirish bo‘yicha ishlarni yo‘lga qo‘yishni taklif qilaman”, — dedi YeIK vaziri.
Ma’lumot uchun, forumda 30 tadan ortiq davlatdan xalqaro tashkilotlar va ishbilarmon doiralar rahbarlari ishtirok etdi.