TOShKENT, 29 apr — Sputnik. MDH Davlatlararo statistika qo‘mitasi “1941-1945 yillardagi Buyuk G‘alabaning 80-yilligi” nomli statistik to‘plamni nashr etdi. Bu haqda MDH Iqtisodiy kengashining 105-majlisi yakunida o‘tkazilgan matbuot anjumanida ma’lum qilindi, deya xabar berdi Sputnik O‘zbekiston muxbiri.
MDH bosh kotibi Sergey Lebedev ta’kidlaganidek, urush yillari Sovet Ittifoqi xalqlarining xalqaro qardoshlik do‘stligi afsona emas, balki haqiqiy buyuk kuch ekanligini ishonchli namoyon etdi.
Katta insoniy yo‘qotishlarga qo‘shimcha ravishda butun SSSR va uning tarkibiga kirgan respublikalar iqtisodiyotiga katta zarar yetkazildi. “Hammasi front uchun! Hammasi g‘alaba uchun!" shiori ostida mehnat qilib, g‘oyat og‘ir sharoitlarda askarlar bilan birgalikda Buyuk G‘alabani yaqinlashtirgan front mehnatkashlarining ulkan hissasini ta’kidlamaslikning iloji yo‘q.
To‘plamda aholi soni, uning asosiy xususiyatlari, odamlarning turmush sharoiti, xalq xo‘jaligining holati va urush holatiga o‘tishi haqidagi statistik ma’lumotlar mavjud.
Cbornik "80 let Velikoy Pobedi 1941-1945"
© Sputnik/Anna Jelixovskaya
"Ushbu statistik to‘plamdagi ma’lumotlar urush arafasida va urush davrida SSSR tarkibiga kirgan respublikalar iqtisodiyotining holati haqida tasavvur beradi. Ma’lumotlar xalq xo‘jaligiga yetkazilgan zarar ko‘lami, urushdan keyingi yillarda sanoat va qishloq xo‘jaligini tiklash, respublikalarni yanada rivojlantirishning asosiy natijalari taqdim etilgan”, — dedi Sergey Lebedev.
To‘plamning alohida bo‘limi har bir ittifoq respublikasining umumiy G‘alabaga qo‘shgan hissasiga bag‘ishlangan.