TOShKENT, 30 mar — Sputnik. “O‘zbekneftgaz” va “KazMunayGaz” o‘rtasida hamkorlik shartnomasi imzolandi. Bu haqda Qozog‘iston neft va gaz sanoatining etakchisi xabar berdi.
Olmaota shahrida “KazMunayGaz” va “O‘zbekneftgaz” o‘rtasida hamkorlik shartnomasi imzolandi. Bitim ikki kompaniya o‘rtasida geologiya-qidiruv ishlari va Qozog‘iston va O‘zbekistonda qo‘shma neft-kimyo loyihalarini amalga oshirish bo‘yicha hamkorlikni rivojlantirishni belgilaydi.
Qayd etilishicha, “O‘zbekneftgaz” kompaniyaning istiqbolli hamkorlaridan biridir.
“Amaldagi kelishuv KMG o‘zbekistonlik hamkasblari bilan resurs bazasini to‘ldirish va neft-kimyo sanoatini rivojlantirish kabi muhim yo‘nalishlarda hamkorlikni kengaytirishga tayyorligini tasdiqlaydi. Bundan tashqari, o‘zaro manfaatlar qatoriga raqamli texnologiyalar, sanoat xavfsizligi va atrof-muhitni muhofaza qilish kiradi”, — dedi "KazMunayGaz" boshqaruvi raisi Asxat Xasenov.
Uning qo‘shimcha qilishicha, mazkur shartnomaning imzolanishi Qozog‘iston va Markaziy Osiyoda energetika barqarorligini ta’minlashga xizmat qiladi.